سياسة الخصوصية
آخر تحديث: تشرين الأول 2026
«سَنَد» منصة بتستعملها المتاجر لترد على زبائنها على واتساب وتستقبل طلباتهم. لما تطلب من متجر بيستعمل سَنَد، المتجر هو المسؤول عن بياناتك، وسَنَد بيخزنها ويعالجها نيابة عنه وبس لهالغرض.
شو البيانات اللي بنجمعها؟
- رقم واتساب واسمك الظاهر عليه.
- الرسائل اللي بتبعتها لرقم المتجر.
- الاسم والعنوان والموقع (إذا بعته) لتوصيل الطلب.
- تفاصيل الطلبات والمبالغ، ونقاط الولاء إذا المتجر مفعّلها.
- صورة إشعار التحويل إذا دفعت بكليك، عشان المتجر يتأكد من الدفعة.
ليش بنستعملها؟
- للرد على أسئلتك وتثبيت طلبك وتوصيله.
- لتبعتلك تحديثات عن طلبك (مثلاً إنه طلع للتوصيل).
- للعروض والتذكيرات، إذا ما ألغيت الاشتراك فيها.
ما منبيع بياناتك، وما منشاركها مع حدا غير المتجر اللي طلبت منه، والسائق اللي بيوصلك الطلب (الاسم والعنوان والرقم بس).
الذكاء الاصطناعي
ردود المتجر على واتساب آلية. إذا المتجر مفعّل خدمة الفهم الذكي، نص رسالتك (والصورة أو الفويس إذا بعتهم) ممكن ينبعت لمزوّد ذكاء اصطناعي (Google Gemini) عشان نفهم شو بدك، وجوجل ممكن تعالجه على خوادم برّا الأردن حسب شروطها. ما منبعتلها أكتر من الرسالة نفسها وقائمة منتجات المتجر. الأسعار والمبالغ بتنحسب دايماً من بيانات المتجر، مش من الذكاء الاصطناعي. بتقدر تكتب «موظف» بأي وقت لتحكي مع حدا من المتجر.
قديش بنحتفظ فيها؟
- سجل المحادثة المؤقت (وين وصلت بالطلب): 30 يوم من آخر رسالة.
- سجل رسائل المحادثة (اللي بتشوفه موظفو المتجر بصندوق المحادثات: رسائلك وردود البوت والموظفين): 90 يوم من آخر رسالة، وبينحذف مع المتجر.
- الطلبات وبيانات التوصيل: طول ما المتجر مشترك بسَنَد، لحساباته وضماناته. لما المتجر يلغي اشتراكه، بتنحذف بياناته كلها.
حقوقك
- وقف الرسائل الترويجية: اكتب للمتجر «وقف الرسائل».
- الاطلاع على بياناتك أو تصحيحها أو حذفها: اكتب للمتجر «موظف» واطلب ذلك، والمتجر بيتواصل معنا لتنفيذه.
- حذف بياناتك نهائياً: الطريقة كاملة بصفحة حذف البيانات.
الأمان
البيانات مخزنة على خوادم محمية، والاتصال مشفّر (HTTPS)، وكل متجر بيشوف بيانات زبائنه هو بس.
سَنَد — تُدار من قبل محل احمد ابو صليح للخلويات · info@sanadbot.com